பயப்படாதே, நான் உனக்குத் துணைநிற்கிறேன்

உன் தேவனாயிருக்கிற கர்த்தராகிய நான் உன் வலதுகையைப் பிடித்து: பயப்படாதே, நான் உனக்குத் துணைநிற்கிறேன் என்று சொல்லுகிறேன் (ஏசா 41:13). ஆண்டவரும் , இரட்சகருமாகிய இயேசுகிறிஸ்துவின் நாமத்தில் உங்களுக்கு வாழ்த்துதல்களை தெரிவித்துக் கொள்ளுகிறேன். மேலே கூறப்பட்டுள்ள வேத வசனத்தை இன்றைய நாளில் தியானத்துக்காக எடுத்துக் கொள்ளுவோம். பிரியமானவர்களே, சூழ்நிலை உங்களுக்கு விரோதமாக, உங்களுக்கு எதிராக உங்களை அமிழ்க்கிறது போல இருக்கலாம். ஆனால் மறந்து விடாதீர்கள், உங்களை சிருஷ்டித்த தேவன் உங்களுடைய பிரச்னைகளைப் பார்க்கிலும், உங்களுடைய சூழ்நிலைகளைப் பார்க்கிலும் அவர் பெரியவராக இருக்கிறார். அவர் உங்களை நடுக்கடலில் தத்தளிக்க விட்டு விட்டு வேடிக்கை பார்ப்பவரல்ல, அவர் உங்களை உங்கள் ஆபத்தான சூழ்நிலையிலிருந்து  விடுதலை செய்பவர், அவரால் எப்படிப்படட சூழ்நிலையாக இருந்தாலும் மாற்றியமைக்க முடியும், அல்லேலூயா ! அதனால் தான் வேத வசனம் சொல்லுகிறது , உலகத்தில் இருப்பவனை பார்க்கிலும் உங்களுக்குள்ளே இருப்பவர் பெரியவர் என்று.  உங்கள் வலதுகையைப் பிடித்து  ‘பயப்படாதே, நான் உனக்குத் துணைநிற்கிறேன்’ என்று சொன்ன தேவன் தனது வாக்குத்தத்தத்தில் உண்மையுள்ளவராக இருக்கிறார், அவர் பொய் சொல்லுவதில்லை. அவர் நேற்றும், இன்றும், என்றும் மாறாதவராக இருக்கிறார். அல்லேலூயா ! ஆகவே எல்லா சூழ்நிலைகளிலும் உங்கள் வலதுகையைப் பிடித்து: பயப்படாதே, நான் உனக்குத் துணைநிற்கிறேன் என்று உங்களுக்கு வாக்குக் கொடுத்த தேவனை நம்புங்கள். அவர் நல்லவர். அல்லேலூயா ! கர்த்தர் உங்களையும், உங்கள் குடும்பத்தையும் ஆசீர்வதிப்பாராக.