என் ஜனங்கள் ஒருபோதும் வெட்கப்பட்டுப்போவதில்லை.

நீங்கள் சம்பூரணமாகச் சாப்பிட்டு, திருப்தியடைந்து, உங்களை அதிசயமாய் நடத்திவந்த உங்கள் தேவனாகிய கர்த்தருடைய நாமத்தைத் துதிப்பீர்கள்; என் ஜனங்கள் ஒருபோதும் வெட்கப்பட்டுப்போவதில்லை. (யோவே 2:26). ஆண்டவரும் , இரட்சகருமாகிய இயேசுகிறிஸ்துவின் நாமத்தில் உங்களுக்கு வாழ்த்துதல்களை தெரிவித்துக் கொள்ளுகிறேன். மேலே கூறப்பட்டுள்ள வேத வசனத்தை இன்றைய தினத்தில் தியானத்துக்காக எடுத்துக் கொள்ளுவோம். பிரியமானவர்களே , யார் என்னுடைய பொருளாதாரப் பிரச்சினையைத் தீர்த்து வைப்பார்? என்னுடைய குடும்பத்  தேவைகள் எவ்வாறு சந்திக்கப்படும்? என்று கலங்கிக் கொண்டிருக்கிறீர்களா? சோர்ந்து போகாதீர்கள். கர்த்தர் உங்களைப் பார்த்து சொல்லுகிறார் ‘என் ஜனங்கள் ஒருபோதும் வெட்கப்பட்டுப்போவதில்லை’ என்று அல்லேலூயா ! அவர் உங்களை ஒரு போதும் வெட்கப்படுத்த மாடடார். கர்த்தர் மீது உங்களுடைய கவனத்தையும், விசுவாசத்தையும் வையுங்கள், கர்த்தர் உங்களை சகல நன்மையினாலும் ஆசிர்வதிக்கப் போகிறார், உங்களுடைய உபத்திரவங்கள் நீங்கப்போகிறது , உங்களுடைய தரித்திரங்கள் நீங்கப்போகிறது. கர்த்தரிடம் இருந்து நீங்கள் சம்பூரண ஆசிர்வாதங்களைப் பெற்றுக்கொள்ளப் போகிறீர்கள். எப்படி. எவ்வாறு என்று எனக்குத் தெரியாது, உங்களுடைய, என்னுடைய மனித ஞானத்தினால், அறிவினால் அதை புரிந்து  கொள்ளவும் முடியாது. ஆனால் கர்த்தர் தன்னுடைய கிருபையினாலும், இரக்கத்தினாலும் அநேக நன்மைகளை உங்களுக்காக ஆயத்தப்படுத்தி வைத்திருக்கிறார். அவருடைய நன்மையினால் நீங்கள் திருப்தியடையப் போகிறீர்கள். நீங்கள் சம்பூரணமாகச் சாப்பிட்டு, திருப்தியடைந்து, உங்களை இதுவரை அதிசயமாய் நடத்திவந்த தேவனை துதிக்கப்போகிறீர்கள் , உங்களுடைய குடும்பத்தில் தேவனுடைய நாமம் மகிமைப்படப் போகிறது. அல்லேலூயா ! தேவன் இயேசு கிறிஸ்து உங்களையும், உங்கள் குடும்பத்தையும் ஆசீர்வதிப்பாராக.