தேவனே உமது நாமத்தை என்னுடைய குடும்பத்தில் மகிமைப்படுத்தும்

பூர்வகாலத்து அக்கிரமங்களை எங்களுக்கு விரோதமாக நினையாதேயும்; உம்முடைய இரக்கங்கள் சீக்கிரமாய் எங்களுக்கு நேரிடுவதாக; நாங்கள் மிகவும் தாழ்த்தப்பட்டுப்போனோம் (சங் 79 :8 ) எங்களை இரட்சிக்கும் தேவனே, நீர் உமது நாமத்தின் மகிமையினிமித்தம் எங்களுக்கு உதவிசெய்து, உமது நாமத்தினிமித்தம் எங்களை விடுவித்து, எங்கள் பாவங்களை நிவிர்த்தியாக்கும் (சங் 79 : 9 ). ஆண்டவரும் , இரட்சகருமாகிய இயேசுகிறிஸ்துவின் நாமத்தில் உங்களுக்கு வாழ்த்துதல்களை தெரிவித்துக் கொள்ளுகிறேன். மேலே கூறப்பட்டுள்ள இரண்டு வேத வசனங்களையும் இன்றைய நாளில் தியானத்துக்காக எடுத்துக் கொள்ளுவோம். பிரியமானவர்களே, இஸ்ரவேல் ஜனங்கள் , தாங்கள் தங்களுடைய வாழ்க்கையில் அனுபவிக்கும் எல்லா பிரச்சினைகளுக்கும், பாடுகளுக்கும், உபத்திரவங்களுக்கும் தாங்கள் பூர்வ காலத்தில், கடந்த நாட்களில் செய்த பாவங்கள் தான் காரணம் என்று அறிந்த அவர்கள் தேவனை நோக்கி தாங்கள் கடந்த நாட்களில் செய்த பாவங்களை மன்னிக்கும்படியும் , தேவனுடைய கண்களில் தங்களுக்கு இரக்கங்கள் கிடைக்கும் படியாகவும், வாழ்க்கையில் தாழ்த்தப்பட்டிருக்கிற அவர்களை தேவன் அவருடைய நாமத்தின் மகிமைக்காக அவர்களை அவர்களின் இறுக்கமான சூழ்நிலையில் இருந்து மீட்டு அவர்களை ஆசிர்வதிக்கும்படியாக விண்ணப்பத்தை ஏறெடுக்கிறார்கள். என்ன தொரு அருமையான ஜெபம் இது. ஆம் பிரியமானவர்களே , நாம் ஒவ்வொருவரும் ஏறெடுக்க வேண்டிய ஜெபம் இது. தேவனால் நீங்கள் ஆசிர்வதிக்கப்பட்ட வேண்டுமானால்,  முதலாவது உங்கள் பாவங்களை தேவன் மன்னிக்க வேண்டும் இரண்டாவது தேவனுடைய கண்களில் உங்களுக்கு இரக்கங்கள் கிடைக்க வேண்டும். தேவன் இயேசுவுக்கு மாத்திரமே ஒருவனுடைய பாவங்களை மன்னிக்க அதிகாரம் இருக்கின்றது. அல்லேலூயா ! நாமும் தேவனை நோக்கி இந்த விண்ணப்பத்தை ஏறெடுத்து எங்களுடைய வாழ்க்கையிலும் தேவன் அவருடைய நாமம் மகிமைப்படும்படியாக அதிசயத்தைச் செய்து அவருடைய நாமத்தை எங்கள் வாழ்க்கையில் பிரஸ்தாபப்படுத்தும் படியாக கேட்ப்போமாக. தேவன் இயேசு உங்களையும்,  உங்கள் குடும்பத்தையும் ஆசீர்வதிப்பாராக.