கர்த்தர் எனக்காக யாவையும் செய்து முடிப்பார்

எனக்காக யாவையும் செய்து முடிக்கப்போகிற தேவனாகிய உன்னதமான தேவனை நோக்கிக் கூப்பிடுவேன் (சங் 57 :2). கர்த்தர் எனக்காக யாவையும் செய்து முடிப்பார் (சங் 138:8). ஆண்டவரும் , இரட்சகருமாகிய இயேசுகிறிஸ்துவின் நாமத்தில் உங்களுக்கு வாழ்த்துதல்களை தெரிவித்துக் கொள்ளுகிறேன். மேலே கூறப்பட்டுள்ள இரண்டு வேத வசனங்களையும் இன்றைய நாளில் தியானத்துக்காக எடுத்துக் கொள்ளுவோம். பிரியமானவர்களே, தாவீதுக்கு தேவன் தன்னை பாதுகாப்பார், பராமரிப்பார், தன்னுடைய தேவைகள் அனைத்தையும் சந்திப்பார், தனக்காக யாவையும் செய்து முடிப்பார் என்கின்றதான விசுவாசம் இருந்தது. அவர் தேவன் மீது வைத்திருந்தான விசுவாசம் தான் அவர் வாழ்க்கையில் செழித்திருக்க காரணமாய் இருந்தது. தாவீதின் வாழ்க்கையில் யாவற்றையும் நேர்த்தியாக செய்து முடித்த தேவன், உங்களுடைய வாழ்க்கையிலும் தேவன் யாவற்றையும்   அவருடைய நாமத்தின் மகிமைக்காக செய்து முடிப்பார் என்கின்றதான விசுவாசம் உங்களுக்கு இருக்கின்றதா? சில சமயங்களில் நீங்கள் ஜெபித்து வருகிற காரியங்கள் நிறைவேறுவதற்கு தாமதிப்பதன் நிமிர்த்தம் உங்கள் மனம் சோர்ந்து போயிருக்கலாம். சோர்ந்து போகாதிருங்கள் ! தேவன் உங்களை கை விட மாடடார், அவர் உங்களுக்கு மிகச்சிறந்தவைகளை  கொடுக்கும்படி ஆயத்தப்படுத்தி வைத்திருக்கிறார், ஆகவே உங்களை முழுமையாக தேவனிடத்தில்  அர்ப்பணித்து , ஜெபத்தில் தரிந்திருந்து அவருடைய வார்த்தைக்கு முழுமையாக கீழ்ப்படிந்து , நீங்கள் செய்கிற யாவற்றிலிருந்தும் தேவகிருபையை நாடும்போது நிச்சயமாக அவர் உங்களுக்காக யாவற்றையும் அவருடைய நாமத்தின் மகிமைக்காக செய்து முடிப்பார். அல்லேலூயா ! தேவன் இயேசு உங்களையும், உங்கள் குடும்பத்தையும் ஆசீர்வதிப்பாராக.