ஜீவனுள்ளோர் தேசத்திலே கர்த்தருடைய நன்மையைக் காண வேண்டுமா ?

நானோ, ஜீவனுள்ளோர் தேசத்திலே கர்த்தருடைய நன்மையைக் காண்பேன் என்று விசுவாசியாதிருந்தால் கெட்டுப்போயிருப்பேன் (சங் 27:13). ஆண்டவரும், இரட்சகருமாகிய இயேசுகிறிஸ்துவின் நாமத்தில் உங்களுக்கு வாழ்த்துதல்களை தெரிவித்துக் கொள்ளுகிறேன். மேலே கூறப்பட்டுள்ள வேத வசனத்தை இன்றைய நாளில் தியானத்துக்காக எடுத்துக் கொள்ளுவோம். பிரியமானவர்களே, தாவீது தன்னுடைய வாழ்க்கையில் பாடுகளுக்கூடாகவும், உபத்திரவங்களுக்கூடாகவும் கடந்து சென்ற போது ‘ நானோ, ஜீவனுள்ளோர் தேசத்திலே கர்த்தருடைய நன்மையைக் காண்பேன்’  என்று விசுவாசித்தார், அவர் தனது இறுக்கமான, நெருக்கமான சூழ்நிலையை பார்க்கவில்லை மாறாக அந்த இறுக்கமான, நெருக்கமான சூழ்நிலையிலிருந்து தன்னை விடுவிக்கப் போகும் கர்த்தர் மீது அவர் அசைக்க முடியாத  , ஒரு பலமுள்ள விசுவாசத்தை வைத்திருந்தார்.  கர்த்தர் மீது அவர் வைத்திருந்த அந்த பலமுள்ள விசுவாசமே அவர் கெட்டுப்போகாத படி, அவர் அழிந்து போகாத படி அவரை பாதுகாத்ததோடு ஜீவனுள்ளோர் தேசத்திலே கர்த்தருடைய நன்மையைக் காண, ருசிக்க அவருக்கு உதவி செய்தது .ஜீவனுள்ள தேசம் என்பது நாம் வாழும் இந்த வாழ்க்கையைக் குறிக்கின்றது.  எபிரேயார் 11:6 இல் வாசிக்கிறோம்  விசுவாசமில்லாமல் தேவனுக்குப் பிரியமாயிருப்பது கூடாதகாரியம் என்று. ஆம் பிரியமானவர்களே,  தாவீதை போல் நாமும்  பிரச்சனையின் மீது நம்முடைய கவனத்தை வைக்காமல் , அந்த பிரச்சனையிலிருந்து எங்களை விடுவிக்கும் கர்த்தர் இயேசு மீது எங்களுடைய விசுவாசத்தை வைப்போம். அப்போது தான் எங்களாலும் தாவீதைப் போல் ஜீவனுள்ளோர் தேசத்திலே கர்த்தருடைய நன்மையைக் காண, ருசிக்க முடியும். அல்லேலூயா ! கர்த்தர் இயேசு உங்களையும் , உங்கள் குடும்பத்தையும்  ஆசீர்வதிப்பாராக.