நீதிமானுக்கு அவன் விரும்புகிறவற்றை கொடுக்கும் கர்த்தர்

நீதிமான் விரும்புகிற காரியம் அவனுக்குக் கொடுக்கப்படும் (நீதி 10:24). ஆண்டவரும் , இரட்சகருமாகிய இயேசுகிறிஸ்துவின் நாமத்தில் உங்களுக்கு வாழ்த்துதல்களை தெரிவித்துக் கொள்ளுகிறேன். மேலே கூறப்பட்டுள்ள வேத வசனத்தை இன்றைய நாளில் தியானத்துக்காக எடுத்துக் கொள்ளுவோம். பிரியமானவர்களே, நீதிமான் என்பவன் யார் ? கர்த்தர் மேல் விசுவாசம் வைத்து, கர்த்தருக்குப் பயந்து, தீமையை  விட்டு விலகி கர்த்தருடைய வழிகளில், சத்தியத்தில் நடப்பவன் என்று பொருள். அவன் கர்த்தருக்குப் பிரியமானவற்றை செய்து அவரைப்   பிரியப்படுத்துகிறவன், அவனிடத்தில் எந்த அநீதியும், துர்க்குணமும் இல்லை. வேதம் சொல்லுகிறது, நீதிமான் விரும்புகிற காரியம் அவனுக்குக் கொடுக்கப்படும் என்று. அல்லேலூயா ! ஆம் பிரியமானவர்களே, நீதிமான் கர்த்தர் மேல் விசுவாசம் வைத்து, அவருக்குப் பிரியமானவற்றை செய்து,  , கர்த்தருடைய வழிகளில் நடந்து கர்த்தரைப் பிரியப்படுத்துகிறபடியால் கர்த்தரும் நீதிமானுக்கு அவன் விரும்புகிற காரியத்தை கொடுத்து அவனை ஆசீர்வதிக்கிறார். அல்லேலூயா ! நாமும் நம்மை ஆராய்ந்து பார்த்து , கர்த்தருக்கு பிரியமில்லாத, கர்த்தரை வேதனைப்படுத்தும் காரியங்கள் நமது வாழ்க்கையில் இருக்குமானால் அவற்றை நமது வாழ்க்கையில் இருந்து அகற்றி விட்டு  கர்த்தருடைய வழிகளில் நடந்து அவருக்கு முன்பாக நீதிமானாக ,உத்தமனாக நடக்கும் போது கர்த்தர் நாம் விரும்புகிற காரியத்தை நமக்கு கொடுத்து நம்மை ஆசிர்வதிக்க அவர் உண்மையுள்ளவராக இருக்கிறார். அல்லேலூயா ! கர்த்தர் இயேசு உங்களையும், உங்கள் குடும்பத்தையும் ஆசீர்வதிப்பாராக.