கர்த்தருடைய கிருபையும், இரக்கங்களும்

நீர் உமது அடியேனுக்குக் கொடுத்த உமது வாக்கின்படி, உமது கிருபை என்னைத் தேற்றுவதாக. நான் பிழைத்திருக்கும்படிக்கு உமது இரக்கங்கள் எனக்குக் கிடைப்பதாக; உம்முடைய வேதம் என் மனமகிழ்ச்சி (சங் 119: 76&77). ஆண்டவரும், இரட்சகருமாகிய இயேசுகிறிஸ்துவின் நாமத்தில் உங்களுக்கு வாழ்த்துதல்களை தெரிவித்துக் கொள்ளுகிறேன். பிரியமானவர்களே! மேலே கூறப்பட்டுள்ள இரண்டு வேத வசனங்களையும் இன்றைய நாளில் தியானத்துக்காக எடுத்துக் கொள்ளுவோம். கர்த்தர் கிருபையும், இரகங்களும் நிறைந்தவர் . கர்த்தருடைய சித்தத்தின் படியே  தன்னுடைய வாழ்க்கையில் எல்லாம் நடக்கின்றது, அவர் சகலத்தையும் தன்னுடைய கட்டுப்பாட்டுக்குள் வைத்திருக்கிறார் என்பதை நன்கு அறிந்திருந்த தாவீது ராஜா தான் வாழ்க்கையில் உபத்திரவப்படும் போது, மனித உதவியை நோக்கிப் பார்க்காமல், தேவனுடைய கிருபைக்காகவும், இரக்கங்களுக்காகவும் தேவனுடைய சமூகத்தில் விண்ணப்பம் பண்ணுகிறார். ஆம் பிரியனானவர்களே கர்த்தருடைய கிருபையும், இரக்கங்களும் நமக்கு கிடைக்குமானால் வாழ்க்கையில் எப்பேர்ப்படட பாடுகளுக்கூடாக, கஷ்டங்களுக்கூடாக, உபத்திரவங்களுக்கூடாக சென்றாலும் கர்த்தருடைய கிருபையும், இரக்கங்களும் நம்மைத் தேற்றும், ஆற்றும்,  அரவணைக்கும், சமாதானப்படுத்தும், அவற்றிலிருந்து பிழைத்திருக்க, விடுபட உதவி செய்யும். தாவீது ராஜாவைப்போல நாமும் விசுவாசத்தோடு கர்த்தருடைய கிருபைக்காகவும், இரகங்களுக்காகவும் விண்ணப்பிப்பதோடு , கர்த்தருடைய வேத வசனங்களை விசுவாசித்து அவற்றில் மனமகிழ்ச்சியாயிருப்போம். அல்லேலூயா. தேவன் இயேசு கிறிஸ்து உங்களையும், உங்கள் குடும்பத்தையும் ஆசீர்வதிப்பாராக.